“Газар тариалангийн салбарын санхүүжилт” зөвлөгөөн амжилттай зохион байгуулагдлаа

Герман-Монголын хамтын ажиллагааны “Тогтвортой Хөдөө Аж Ахуй” төслөөс ХХААЯ-тай хамтран энэ сарын 08-09-ны өдрүүдэд Улаанбаатар хотноо “Газар тариалангийн салбарын санхүүжилт” сэдвээр хоёр өдрийн зөвлөгөөн зохион байгууллаа. Тус зөвлөгөөнд нийт 90 гаруй төлөөлөгчид оролцсон бөгөөд ХХААЯ болон яамны харьяа байгууллагуудын төлөөлөгчдөөс гадна банк санхүүгийн байгууллагууд, даатгалын байгууллагууд, ХАА-н техник тоног төхөөрөмж борлуулагчид, газар тариалангийн үйлдвэрлэл эрхлэгчид оролцлоо.

Тус зөвлөгөөнд ХБНГУ-ын Хоршоологчдын төв банкны зөвлөх мэргэжилтэн Др. Г. Вэссэлманн, ИКБ Лийзинг ХХК-ийн дэд Ерөнхийлөгч Г. Мюбес, Аммак МЖЛ ХХК-ийн гүйцэтгэх захирал Б. Уяанга болон Хаан Банк, Хас Лийзинг ХХК-ийн төлөөлөгч нар илтгэл тавьж оролцлоо.

Энэхүү зөвлөгөөний гол зорилго нь газар тариалангийн үйлдвэрлэл эрхлэгчдэд зориулсан санхүүгийн үйлчилгээ, зээлийн үйлчилгээ зэргийг сайжруулах, боловсронгүй болгох арга замуудыг эрэлхийлэхэд оршисон бөгөөд Германаас ирсэн зөвлөх мэргэжилтнүүд маань ХБНГУ болон Европын Холбооны газар тариалангийн үйлдвэрлэлийн салбар дахь санхүүгийн үйлчилгээний талаар  танилцуулж, энэхүү туршлага мэдлэгийг хэрхэн Монголын хөрсөнд буулгах асуудлаар салбарын мэргэжилтэн, судлаачидтай санал бодлоо солилцон, бодлогын зөвлөгөө өгсөн.

Зөвлөгөөнөөс гарсан гол үр дүнгүүдийг нэгтгэн хууль эрхзүйн орчныг сайжруулах, санхүүгийн үйлчилгээний нөхцөлүүд ба хүртээмжийг сайжруулах, оролцогч талуудын хоорондын мэдээллийн урсгалыг сайжруулах чиглэлээр бодлогын зөвлөмж боловсруулж ХХААЯ-нд хүргэлээ. Зөвлөмжид орсон гол санаануудаас дурьдвал:

1. ХАА салбарт гадны зээл тусламжууд нэмэгдүүлэх, хөрөнгө оруулалтыг татах

2. Газар тариалангийн үйлдвэрлэл эрхлэгчдэд олгох зээлийн хэмжээг нэмэгдүүлэх, ингэхдээ агуулахын бүтээгдэхүүнээ барьцаалан зээл авах  боломжуудыг бий болгох

3. Хүү багатай, урт хугацааны зээлийн бүтээгдэхүүнийг бий болгох

4. Газар тариалангийн салбарын эрсдлийг багасгах, ингэхдээ тус салбарт даатгалын үйлчилгээг нэвтрүүлэх, боловсронгүй болгох

5. Оролцогч талуудын хоорондын мэдээллийн урсгалыг сайжруулах ингэхдээ тухайн чиглэлээр тогтмол мэдээллийн арга хэмжээ, сургалт зэргийг зохион байгуулах

Дээрх зөвлөмжийг энэ сарын 15-ны өдөр ХХААЯ, Монгол банк, Дэлхийн банкны хамтран зохион байгуулж буй “ХАА-н салбарын санхүүжилтийн шинэ арга хэрэгслүүд” сэдэвт олон улсын бага хуралаар танилцуулах юм.