Хөдөө аж ахуйн зөвлөх үйлчилгээний ажлын хэсгийн дөрөвдүгээр уулзалт
Герман-Монголын хамтын ажиллагааны “Тогтвортой хөдөө аж ахуй” төслийн хүрээнд Монгол улсын ХАА-н зөвлөх үйлчилгээнд оролцогч талуудад зөвлөн туслах чиг үүрэгтэйгээр 2022 онд байгуулагдсан ажлын хэсгийн 4 дэх уулзалт 2023 оны 3 дугаар сарын 21-ний өдөр Улаанбаатар хотод зохион байгуулагдлаа. Уулзалтанд ТХАА төсөл, ХХААХҮЯ, ХААДС, ХХААХҮСХТ, МТҮХ, УГТХ, ШХА-ийн санхүүжилттэй “Монгол ногоо” төсөл, Эх булаг Монголын ногоочдын холбоо, Дорнод аймгийн ХХААГ зэрэг газар тариалангийн салбарын бодлого, эрдэм шинжилгээ, зөвлөх, нэвтрүүлэх үйлчилгээ хариуцсан гол байгууллагууд, мэргэжлийн холбоодын төлөөлөл 14 хүн оролцлоо.
Уулзалтын үеэр “2022 оны ажлын хэсгийн уулзалтуудаас гарсан зөвлөмж, 2023 онд төлөвлөсөн ажлын хэсгийн үйл ажиллагаа”-ын талаар ТХАА төслийн зөвлөх доктор Б.Эрдэнэболор, ХААДС-гаас тариаланчдад үзүүлж буй дэмжлэг, түүнийг экстейншний үйлчилгээнд холбох боломжийн талаар тус сангийн ХАА-н үйлдвэрлэлийн газрын мэргэжилтэн Н.Чинзориг, ХАА-н зөвлөх үйлчилгээний хууль, эрх зүйн орчныг бий болгох боломжийн талаар ХХААХҮЯ-ны Бодлого, төлөвлөлтийн газрын ахлах мэргэжилтэн Б.Уранчимэг тус тус мэдээлэл өгч, хэлэлцүүллээ. Хэлэлцүүлгийн явцад оролцогчид:
1) Тариалангийн хуульд нэмэлт өөрчлөлт оруулах замаар газар тариалангийн зөвлөн туслах үйлчилгээний талаарх эрх зүйн зохицуулалтыг бий болгох талаар ХХААХҮЯ-ны Бодлого, төлөвлөлтийн газартай хамтран ажиллах,
2) Хуульд нэмж оруулах заалтуудын төслийг бэлтгэх, уг заалтуудад ХАА-н зөвлөн туслах үйлчилгээний талаар нэгдсэн ойлголт бий болгох, хувийн хэвшлийн оролцоог хангах, орон нутагт тариаланчдад зөвлөн туслах багуудыг аймгуудын ерөнхий агрономчдын ерөнхий удирдлага, зохицуулалттайгаар бий болгох, зөвлөн туслах үйлчилгээ эрхлэгчид, зөвлөхүүдийг сертификатжуулах, хариуцлагажуулах, үйлчилгээний төлбөрийн зохих хэсгийг тариаланчдаас гаргуулах, зөвлөн туслах үйлчилгээнд тариалангийн технологиос гадна менежмент, санхүүгийн сэдвүүдийг хамруулах зэрэг асуудлуудад анхаарах,
3) Төлөвлөсөн эрх зүйн зохицуулалттай уялдуулан ХААДС-аас тариаланчдад үзүүлж буй дэмжлэгт зөвлөн туслах үйлчилгээг хавсаргах, эрдэм шинжилгээний байгууллагуудад үндсэн ажилтай судлаачдад зөвлөн туслах үйлчилгээний ажил хавсран эрхлэхийг зөвшөөрөх, зөвлөх мэргэжилтнүүдийн ажлын туршлага, ажилласан бүс нутгуудыг тодорхой харуулсан цахим бүртгэл бий болгох зэрэг саналуудыг дэвшүүллээ.