“Хүнсний ногооны борлуулалт, чанарын менежмент, Ногоочдын нэгдсэн зохион байгуулалтад оруулах нь ” сэдэвт сургалт Улаанбаатар хот

Герман-Монголын хамтын ажиллагааны “Тогтвортой хөдөө аж ахуй” төслөөс Эх булаг Монголын ногоочдын холбоо, Хүнс, хөдөө аж ахуй, хөнгөн үйлдвэрийн судалгаа, хөгжлийн төв, Ховд аймгийн Хүнс, хөдөө аж ахуйн газартай хамтран, үйлдвэрлэгчдийн хамтын ажиллагаа, нөхөрлөлийг дэмжих замаар хүнсний ногооны борлуулалтын сүлжээг дэмжих, хоршоо бүлэг байгуулах зорилготой сургалт 2023 оны 8-р сарын 03-04-ний өдрүүдэд Улаанбаатар хотод хоёр өдрийн сургалтыг зохион байгууллаа. Тус сургалтанд Ховд аймгийн ногоочдын холбооны Удирдах зөвлөлийн гишүүд, Сэлэнгэ аймгийн гишүүд, Эх булаг Монголын ногоочдын холбооны Удирдах зөвлөлийн гишүүд, Ховд аймгийн газар тариалан хариуцсан мэргэжилтнүүд, Улаанбаатар хотын 9 дүүргийн ХХААГ-ын зөвлөх, мэргэжилтнүүд зэрэг нийт 40 гаруй төлөөлөл оролцлоо.

Энэ удаагийн сургалт танхим болон 1000 машины зогсоолын талбайд, тариалан эрхлэгчид, өөрсдийн тариалсан хүнсний ногоогоо борлуулж буй ногоочидтой туршлага судлах хэлбэрээр зохион байгуулсан нь онцлог байсан. Уг сургалтаар ногоочдын бүлэг, нөхөрлөлийг дэмжих замаар хүнсний ногооны борлуулалтын сүлжээг дэмжих, чанарын үнэлгээний хялбаршуулсан журам нэвтрүүлэх мөн мэдлэг дамжуулагчдаар дамжуулан орон нутгийн ногоочдод зөвлөө өгөх, хүнсний ногооны нийлүүлэлтийн сүлжээг сайжруулах арга хэмжээ авч хэрэгжүүлэх, дижитал платформ ашиглах, маркетингийн хамтарсан хүчин чармайлт гаргах, зах зээлд нэвтрэх боломжийг хангах, Хүнсний ногоо үйлдвэрлэгчдэд зориулсан харилцан уялдаатай сүлжээг бий болгохын тулд чанарын баталгаатай, байгаль орчны тогтвортой байдалд нийцсэн, хэрэглэгчдийг татан оролцуулахад онцгой анхаарал хандуулах хэрэгтэй гэдгийг оролцогчид хамтран хэлэлцлээ.

Сургалтын үеэр төслийн олон улсын зөвлөх Кэвин Галлагер, ТХАА төслийн мэргэжилтэн Б.Эрдэнэболор нар хүнсний ногооны борлуулалт болон чанарын менежментийн талаарх дотоодын ба олон улсын туршлага, хоршоо байгуулахын давуу талууд түүний, цаашдын чиг хандлагын талаар мэдээлэл өгч, оролцогчидтой хэлэлцүүлэг өрнүүллээ.