“Газар тариалангийн инноваци” сэдэвт цахим зөвлөлдөх уулзалтыг зохион байгуулав

Герман-Монголын хамтын ажиллагааны ”Тогтвортой хөдөө аж ахуй төсөл, Хөдөө аж ахуйн их сургууль хамтран 2022 оны 12 дугаар сарын 27-ны өдөр “Газар тариалангийн инноваци” сэдэвт цахим зөвлөлдөх уулзалтыг зохион байгуулав.

Монгол улсын урт хугацааны хөгжлийн бодлогын баримт бичиг “Алсын хараа 2050”-д “Хөдөө аж ахуйг байгальд ээлтэй, уур амьсгалын өөрчлөлтөд дасан зохицсон, эрсдэл даах чадвартай, нийгмийн хөгжлийн чиг хандлага, хэрэгцээ, шаардлагад нийцсэн, хариуцлагатай, бүтээмж өндөр, тогтвортой үйлдвэрлэлтэй эдийн засгийн тэргүүлэх салбар болгон хөгжүүлнэ” гэж заасан. Байгальд ээлтэй, уур амьсгалын өөрчлөлтөд дасан зохицсон газар тариаланг эрхлэхэд Монгол орны онцлогт тохирсон шинэ санаачлага, инновацийг нэвтрүүлэх хэрэгцээ шаардлага их байгаа билээ. Тогтвортой хөдөө аж ахуй төслөөс салбарын шинжлэх ухааны байгууллагын нэвтрүүлсэн инноваци, аж ахуй эрхлэгчид өөрийн аж ахуйд тохирсон технологи ашиглан, практикт нэвтрүүлсэн сайн туршлагыг түгээн дэлгэрүүлэх хэрэгцээ шаардлагыг харгалзан “Газар тариалангийн инноваци” сэдэвт цахим зөвлөлдөх уулзалтыг зохион байгуулсан юм.

Тус зөвлөлдөх уулзалтаар төслийн Монгол талын түнш байгууллага болох ХААИС-ийн профессор Б.Мөнхбат Монгол Улсын хүнс, хөдөө аж ахуйн салбарыг үйлдвэрийн цогцолбор болгох зорилгоор дижитал платформын концепцийг боловсруулж, салбарын яаманд хүргэхээр бэлтгэсэн саналыг танилцуулж, Г.Гантулга ХАА, газар тариалангийн салбарын хөгжлийн бодлого зорилт, тулгамдсан асуудал, шийдэл, аж үйлдвэрийн 4 дүгээр хувьсгал ба газар тариалангийн хөгжлийн ирээдүйн хандлага, монгол орны газар тариалангийн үйлдвэрлэлд ухаалаг технологи ашиглах шаардлага, боломжийн талаар оролцогчдод танилцуулж, хэлэлцлээ. Тус зөвлөгөөний онцлох сэдэв нь “Нөхөн сэргээх газар тариалан” байсан бөгөөд Хэнтий тариалан ХХК-ний захирал Б.Батнаран биологийн олон янз байдлыг хамгаалж, эдийн засгийн үр ашигтай аж ахуй эрхлэж буй практик туршлагынхаа талаар танилцуулсан юм. Мөн уг зөвлөгөөний хүрээнд зайлшгүй яригдах сэдвийн нэг болох “Усалгааны системийн инноваци” илтгэлийг Др. Л.Баяртулга танилцууллаа.